எண்ணெய் vs சர்க்கரை

எண்ணெய் vs சர்க்கரை! அம்பலமான உணவு அரசியல்

எண்னெய் அதிகம் சேர்த்தா, கொலஸ்ட்ரால் அதிகமாகி இதய நோய்க்கு வழிவகுக்கும்' என்று மருத்துவ உலகம்  அரை நூற்றாண்டுக்கும் மேல் சொல்லி வருகிறது. இந்நிலையில், 'உண்மையில் சர்க்கரைதான் இதய நோய்க்கு முக்கியக் காரணம். ஆனால், உலகளாவிய சர்க்கரைச் சந்தையும் அரசியலும் அந்த உண்மையை மறைக்க, 1960-ஆம் ஆண்டு, பிரபல மருத்துவப் பத்திரிகையில் 'இதய நோய்க்குக் காரணம் எண்ணையே' என்று பெரிய தொகையை 'செலவழித்து' எழுதவைத்து, பயத்தை கொழுப்பின் பக்கம் திருப்பிவிட்டுவிட்டது' என்று சமீபத்தில் அம்பலப்படுத்தியிருக்கிறது, அமெரிக்க மருத்துவ இதழானா ஜாமா (JAMA Journal of American Medical Association).

'ஜாமா' கூறுவது என்ன?

'1960-களில் 'Internal Sugar Industry - Sugar Research Foundation (இன்று இது 'சுகர் அசோஸியேஷன்' என்று அழைக்கப்படுகிறது) அமைப்பு நடத்திய ஆய்வில், எண்ணெயைவிட உடலில் கொழுப்புச்சத்தை அதிகம் சேரவைத்து இதய ரத்தக் குழாய் நோய்கள் (CVD Cardio Vascular Disease) ஏற்பட பெரிதும் காரணமாக இருப்பது சர்க்கரைதான்' என்ற உண்மை, மார்க் ஹெக்ஸ்டட் மற்றும் ராபர்ட் மெக்கண்டி என்ற ஆராய்ச்சியாளர்களால் கண்டுபிடிக்கப்பட்டது.

இந்த ஆய்வை வெளியிட்டால், சர்வதேச சர்க்கரை வணிகம் பாதிக்கப்படும், அதன் மூலம் கிடைக்கும் பெருமளவு லாபம் குறையும் என்பதால், இந்த உண்மை மக்களைச் சென்றடையாமல் இருக்க, உலகம் முழுக்க பிரதிநிதிகள் நியமிக்கப்பட்டார்கள். மேலும், சர்க்கரை மீதான குற்றச்சாட்டை எண்ணெயின் பக்கம் திருப்ப, நியூ இங்கிலாந்து ஜார்னல் ஆஃப் மெடிசின் என்ற மருத்துவ இதழில், ஆய்வின் உண்மையான முடிவுகள் மாற்றப்பட்டு, 'உடல் பருமனுக்கும் அது சம்பந்த்மான நோய்களுக்கும் பெரிதும் காரணம், எண்ணெய் பொருட்களே' என்று எழுதவைத்தனர். மேலும், இவ்வாறு முடிவுகளை மாற்றி வெளியிட்டதற்கான சம்பந்தப்பட்ட இரண்டு ஆய்வாளர்களுக்கும் பெரும் தொகை வழங்கப்பட்டது.

இந்த அதிர்ச்சியான ஊழலைத்தான் சமீபத்தில் அம்பலமாக்கியிருக்கிறது 'ஜாமா' இதழ். வேதியலாளர் மற்றும்  'ஜாமா'வின் சர்க்கரை குறித்த அறிவியல் ஆலோசகர் க்ரிஸ் கெரன் என்ற பெண் அந்த இதழில் எழுதியுள்ள இந்த ஆய்வுக் கட்டுரை, உலகம் முழுக்க அதிர்வலைகளை ஏற்படுத்தியுள்ளது.

'சர்வதேச மக்கள் அமெரிக்க ஆய்வு முடிவுகளைச் சார்ந்து இருப்பதை பயன்படுத்திக்கொண்டு, பணம் கொடுத்து, சர்க்கரையில் பொதிந்துள்ள ஆபத்தை உலகின் கவனத்துக்குச் சென்றுவிடாமல் தடுக்கப்பட்டுள்ளது. மேலும், இத்தனை ஆண்டுகளாக சர்க்கரையின் ஆபத்தை மறைத்து, அதை மக்களின் அன்றாட, தவிர்க்கமுடியாத உணவாக வளர்த்துவிட்டிருக்கிறது 'சுகர் அசோசியேஷனின் சர்வதேச சந்தை. சராசரியாக அமெரிக்கர்கள் ஒரு நாளைக்கு 10 சதவிகித சர்க்கரையை தங்கள் உணவில் சேர்த்துக்கொள்கிறார்கள். இளவயது மரணங்களுக்கு இந்த உணவுப் பழக்கமே முக்கியக் காரணமாக அமைகிறது. சர்க்கரையால் இத்தனை ஆண்டுகளாக பலியாக்கப்ப்பட்ட உயிர்களுக்கு என்ன பதில்?' என்று கேட்கிறார், கட்டுரையாளர் க்ரிஸ் கெரன்.

மருத்துவர்களின் சர்க்கரையின் ஆபத்து பற்றிச் சொல்லும்போது, 'சர்க்கரை என்பது ஃப்ரக்டோஸ் (FRUCTOSE) மற்றும் குளுக்கோஸ் (GLUCOSE) சமபங்கு கலவை. இதில் குளுக்கோஸ் எளிதில் ஜீரணமாகும். ஆனால், ஃப்ரக்டோஸை ஜீரணிக்க கல்லீரலில் உள்ள நொதியால் மட்டுமே முடியும். அளவுக்கு அதிகமாக சர்க்கரை உண்ணும்போது, அதற்கு ஈடுகொடுத்து கல்லீரலால் அந்த நொதியைச் சுரக்கமுடியாத காரணத்தால், ஃபிரக்டோஸ்  கொழுப்பாக மாற்றப்பட்டு உடலில் சேகரிக்கப்படும்.  இதுவே இதய ரத்தக் குழாய் அடைப்பு நோய்க்கு முக்கியக் காரணியாக அமைகிறது.

மேலும், கல்லீரலில் கொழுப்பு சேர்வதால் குடிப்பழக்கம் இல்லாதவர்களுக்கும் கல்லீரல் வீங்கும் பிரச்னையான ஆல்கஹால் அல்லாத  ஃபேட்டி லிவர் நோய் (NON ALCHOHOLIC FATTY LIVER DISEASE) ஏற்படுகிறது.
    
சர்க்கரையில் வைட்டமின்கள், தாதுஉப்புக்கள் என எந்த ஊட்டச்சத்தும் இல்லை. அது தருவது வெறும் கலோரிகளைத்தான். இந்த அதிகப்படியான கலோரிகள் கொழுப்பாக மாற்றப்பட்டு உடலில் சேரிக்கப்படுவதால், உடல் பருமன், சர்க்கரை நோய், புற்றுநோய், மாரடைப்பு, பக்கவாதம் என பல பிரச்னைகள் ஏற்படும்' என்று சர்க்கரை மீது மருத்துவர்கள் வைக்கும் குற்றச்சாட்டுகள் நிறைய.   

சர்வதேச உணவுச் சந்தை, தனிமனிதப் பேராசை, விலைபோகும் ஆராய்ச்சியாளர்கள், குழந்தையைக் கிள்ளி தொட்டிலை ஆட்டும் மருந்துச் சந்தை... இவர்கள் அனைவரும் மக்களைவைத்து ஆடும் ஆடு புலி ஆட்டத்தில், சர்க்கரையில் இருந்து அரிசி, நூடில்ஸ், பிரெட் என நம் தட்டில் விழும் ஒவ்வொரு பொருளும் உணவா விஷமா எனற கேள்வி, தொடர்ந்துகொண்டேதான் இருக்கப்போகிறது!

காசோலை பற்றி உங்களுக்கு முழுசா தெரியுமா?

அ முதல் ஃ வரை உங்களுக்காக...

காசோலை என்பது, வங்கியில் இருந்து ஒரு தனி நபருக்கோ ஒரு நிறுவனத்திற்கோ ரொக்கப் பணத்தைச் செலுத்துவதற்கு, கணக்கு வைத்திருப்பவர் மூலம் வழங்கப்படும் ஒரு கட்டண கருவியாகும். தவிர, காசோலை மூலம் ஒரு வங்கியில் இருந்து மற்றொரு வங்க்கிக்கு பணத்தைப் பரிமாற்றம் செய்யலாம். நம் அன்றாட செலவுகளைப் பணத்திற்குப் பதிலாக காசோலை மூலம் செய்து கொள்ளலாம். காசோலை என்பது ஒரு முக்கியமான செலாவணி. காசோலையின் மூலம், அதிகளவு தொகையை எளிமையாகக் கையாளலாம். 

ஒரு காசோலையில் இடம்பெற வேண்டிய முக்கியமான தகவல்கள்:

1.   ஒரு காசோலை குறிப்பிட்ட வங்கி மீது மட்டுமே வரையப்பட வேண்டும். (Drawee)

2.   காசோலையில் கொடுப்பவர் அதாவது விநியோகிப்பவரின் கையெழுத்து நிச்சயமாக இடம்பெற  வேண்டும். (Drawer)

3.   காசோலையில் பணம் பெறுபவரின் பெயர் இடம்பெற வேண்டும். (Payee)

4.   காசோலையில் எவ்வளவு பணம் என்பதை வார்த்தைகளில் கண்டிப்பாக குறிப்பிடப்பட்டிருக்க வேண்டும்

5.   காசோலையில் கண்டிப்பாக தேதி குறிப்பிடப் பட்டிருக்க வேண்டும்.

காசோலைகளின் வகைப்பாடு:

பணம் செலுத்த மிகவும் பாதுகாப்பான முறைகளில் ஒன்றுதான், காசோலை. காரணம், ஒவ்வொரு காசோலை பரிமாற்றமும் வங்கிகளில் பதிவு செய்யப்படுகிறது. நமக்குத் தேவைப்பட்டால் காசோலை விவரங்களை எப்போது வேண்டுமானாலும் அறிந்து கொள்ளலாம்.

இடத்தை மையப்படுத்தி காசோலைகள் மூன்றாகப் பிரிக்கப்படுகின்றன.

1.   உள்ளூர் காசோலை (Local cheque):

பணம் பெறுபவர் வசிக்கும் அதே ஊரிலுள்ள வங்கியில் காசோலை வழங்கப்பட்டால், அது உள்ளூர் காசோலை எனப்படும்.

2.   வெளியூர் காசோலை (Outstation cheque):

ஒரு குறிப்பிட்ட நகரின் உள்ளூர் காசோலை, பிற இடங்களில் வழங்கப்படுகிறது என்றால் அது வெளியூர் காசோலை எனப்படும். இந்த காசோலைகளைப் பயன்படுத்துவது மூலம், வங்கிகள் நம்மிடம் இருந்து நிலையான கட்டணங்களை வசூலிக்கலாம்.

3.   சம காசோலை (At Par cheque):

இது நாடு முழுவதும் ஒரு வங்கியின் அனைத்து கிளைகளிலும் இணையாக ஏற்கப்படுகின்ற ஒரு காசோலை. உள்ளூர் காசோலை போல கூடுதல் வங்கிக் கட்டணங்களை ஈர்க்காமல் நாடு முழுவதும் இந்த காசோலை ஏற்றுக் கொள்ளப்படுகிறது.

மதிப்பின் அடிப்படையில் காசோலைகளின் வகைப்பாடு.

1.   சாதாரண மதிப்புடைய காசோலைகள் (Normal Value Cheque):

ரூ. 1 லட்சத்திற்கும் கீழ் மதிப்புடைய காசோலைகள் சாதாரண மதிப்புடைய காசோலை எனப்படும்.

2.   உயர் மதிப்புடைய காசோலைகள் (High value cheque):

ரூ. 1 லட்சத்தை விட அதிகளவு மதிப்புடைய காசோலைகள் உயர் மதிப்பு காசோலைகள் எனப்படும்.

3.   பரிசு காசோலைகள் (Gift Cheque):

அன்பிற்குரியவர்களுக்கு பரிசாகக் கொடுக்கும் காசோலைகள் பரிசு காசோலைகள் எனப்படும்.

காசோலைகள் பொதுவாக நான்கு வகைப்படும்.

1.   கீறாக் காசோலை (Open cheque):

வங்க்கியில் கவுண்டரிலேயே ஒரு காசோலையைக் கொடுத்து பணத்தைப் பெற முடிந்தால், அது கீறாக்காசோலை எனப்படும். ஒருவர் தனது சொந்தக் கணக்கில் இருந்து தானே பணத்தைப் பெறலாம். இல்லையெனில், வேறு யாரிடமாவது கையெழுத்திட்டு கொடுத்து பணத்தைப் பெற சொல்லலாம்.

2.   கொணர்பவர் காசோலை (Bearer cheque):

கொணர்பவர் காசோலை மூலம் ஒரு வங்கியில் காசோலை கொடுப்பவர் யாராயினும் பணத்தைப் பெற முடியும். இந்த காசோலையை ஒப்புதல் இல்லாமல் யார் வேண்டுமானாலும் வேறொருவருக்குக் கொடுக்கலாம்.

3.   ஆணைக் காசோலை (Order cheque):

இது ஒரு குறிப்பிட்ட நபருக்கு அளிக்கப்படும் காசோலையாகும். இத்தகைய காசோலையில் “bearer” என்ற வார்த்தை அடிக்கப்பட்டு “order” என எழுதப்படலாம். பணம் பெறுபவர் (Payee), காசோலைக்குப் பின்புறத்தில் கையெழுத்திட்டு வேறொருவருக்கு அதே காசோலையை மாற்றிவிடலாம்.

4.   கோடிட்ட காசோலை (crossed cheque):

கோடிட்ட காசோலையை கவுண்டரில் கொடுத்து பணத்தை பெற முடியாது. இத்தகைய காசோலை மூலம் வங்கி, பணம் பெறுபவர் கணக்கில் மட்டுமே பணத்தை வரவாக வைக்கும். ஒரு காசோலையின் மேல் இடப்பக்கத்தில் 2 கோடுகள் வரையப்பட்டாலோ, “account payee”  என எழுதப் பட்டாலோ அது கோடிட்ட காசோலையாகக் கருதப்படும்.

இதுதவிர, பண உத்திரவாதம் அளிக்கும் பல காசோலைகளை வங்கிகள் வழங்க்குகின்றன.

சுய காசோலை (Self cheque):

சுய காசோலை என்பது, வங்கியில் கணக்கு வைத்திருப்பவர் தனக்குத் தானே வரைந்து கொள்ளும் காசோலையாகும். இவர் கணக்கு வைத்திருக்கும் கிளையில் தானே சென்று பணத்தைப் பெற்றுக் கொள்வார். இதற்கு மாற்றாக ஏடிஎம் கார்டை பயன்படுத்திக் கொள்ளலாம்.

பின் தேதியிட்ட காசோலை (Post dated cheque):

இந்த காசோலை, எதிர்காலத்தில் பயன்படுத்துவதற்கு ஏதுவாக, பின் தேதியிட்டு அளிக்கப்படும். காசோலையில் குறிப்பிடப்பட்டிருக்கும் தேதியில் இருந்து 3 மாதங்கள் வரை இது செல்லுபடியாகும்.

வங்கியாளரின் காசோலை (Banker’s cheque):

வங்கியாளரின் காசோலை மூலம் கணக்கை வைத்திருப்பவரிடம் இருந்து பணததைப் பெறாமல், தனது சொந்த நிதியில் இருந்து வங்கி பனத்தை எடுத்துக் கொள்ளும். சாதாரன காசோலையைப் போல வங்கியாளரின் காசோலையை நிராகரித்து விட முடியாது.

பயணியின் காசோலை (Traveller’s cheque):

ஒரு பயணி, வெளிநாட்டுப் பயணாத்தின்போது பணத்திற்குப் பதிலாகக் கொண்டு செல்லக் கூடிய காசோலை. பயணியின் காசோலை ஒரு திறந்த வகை காசோலை. ,வாழ்நாள் முழுவதும் செல்லுபடியாகக் கூடியது. பயணியின் காசோலை உணவகங்களிலும், அனைத்து இடங்க்களிலும் பரவலாக ஏற்றுக் கொள்ளப்படும். ஒரு பயணத்தின் போது, பயன்படுத்தாத காசோலைகளை மறு பயணத்தில் பயன்படுத்திக் கொள்ளலாம்.

Financial management

https://www.facebook.com/TSATHIESHKUMAR/videos/10208258389030930/

தர்பூசணி

கூல் கூல் காய் - கனிகள்... ஜில் ஜில் உணவுகள்!

கத்தரி வெயில் கதகளி ஆடிக்கொண்டிருக்கும் காலகட்டம் இது. வெயிலைக் கொடுக்கும் இயற்கை, அதை சமாளிக்க உதவும் காய் - கனிகளை வாரிவழங்குவதிலும் குறை வைப்பதில்லை. தர்பூசணி, வெள்ளரி, எலுமிச்சை, இளநீர், நுங்கு என்று சமய சஞ்சீவினிகளாக விளங்கும் காய் - கனி வகைகள், வெயிலின் தாக்கத்திலிருந்து நமக்கு நிவாரணம் அளிக்க, கடைவீதிகளில் குவிந்து கிடக்கின்றன. இவற்றை அப்படியே சாப்பிடுவதோடு மட்டுமல்லாமல், ஜூஸ், சர்பத், மில்க் ஷேக், லஸ்ஸி, சாலட், கூட்டு என தயாரித்து சாப்பிட்டால்... இரட்டை கொண்டாட்டம்தானே! இந்த இணைப்பிதழில் வெரைட்டியான, வித்தியாசமான கோடை உணவுகளை வழங்குகிறார் சமையல்கலை நிபுணர் எஸ்.ராஜகுமாரி.

தர்பூசணி - ஸ்ட்ராபெர்ரி ஜூஸ்

தேவையானவை: தோல், விதை நீக்கிய தர்பூசணித் துண்டுகள் - 4 கப், லேசாக தோல் சீவி, நறுக்கிய ஸ்ட்ராபெர்ரி துண்டுகள் - 4 டேபிள்ஸ்பூன், எலுமிச்சைச் சாறு - 4 டீஸ்பூன், சர்க்கரை  சிரப் - 4 டேபிள்ஸ்பூன், ஐஸ்கட்டிகள் - தேவையான அளவு, தர்பூசணித் துண்டுகள் (அலங்கரிக்க) - 10.

செய்முறை: தர்பூசணித் துண்டுகள், ஸ்ட்ராபெர்ரித் துண்டுகள், எலுமிச்சைச் சாறு, சர்க்கரை சிரப் ஆகியவற்றை மிக்ஸியில் சேர்த்து நன்றாக  அடிக்கவும். ஒரு கண்ணடி டம்ளரில் 2, 3 ஐஸ் கட்டிகளைப் போட்டு மேலே மிக்ஸியில் அடித்த ஜூஸை ஊற்றி, இரண்டு தர்பூசணித் துண்டுகள் சேர்த்து அலங்கரித்து பரிமாறவும். 

குறிப்பு: 8 டேபிள்ஸ்பூன் சர்க்கரையுடன் 2 டேபிள்ஸ்பூன் தண்ணீர் சேர்த்துக் கொதிக்கவிட்டு, ஒரு கம்பிப் பதம் வந்ததும் இறக்கினால், சர்க்கரை சிரப் தயார்.

---

இளநீர் - தர்பூசணி டிலைட்

தேவையானவை: இளநீர் - 2 கப், தோல், விதை நீக்கிய தர்பூசணித் துண்டுகள், இளநீர் வழுக்கை - தலா ஒரு கப், சர்க்கரை - அரை கப், எலுமிச்சைச் சாறு - ஒரு டேபிள்ஸ்பூன்.

செய்முறை: பாதி அளவு தர்பூசணியை மிக்ஸியில் அடித்து ஜூஸாக்கி, 8 கட்டிகள் வரும் விதத்தில் ஐஸ் ட்ரேயில் ஊற்றி ஃப்ரீசரில் உறைய வைக்கவும். மிக்ஸியில் இளநீர் வழுக்கை, சர்க்கரை, தர்பூசணித் துண்டுகளை சேர்த்து அடித்து... இளநீர், எலுமிச்சைச் சாற்றுடன் நன்றாகக் கலந்து, கிளாஸ்களில் ஊற்றி, ஒவ்வொரு கிளாஸிலும் 2 தர்பூசணி ஐஸ்கட்டிகளை மிதக்கவிட்டால்... இளநீர் - தர்பூசணி டிலைட் ரெடி.

---

தர்பூசணி ஷேக்

தேவையானவை: தோல், விதை நீக்கிய தர்பூசணித் துண்டுகள் - அரை கப், புளிக்காத புதிய தயிர் - ஒரு கப், ஸ்ட்ராபெர்ரி - 5 (லேசாக தோல் சீவி, துண்டுகளாக்கவும்), சர்க்கரை - 4 டேபிள்ஸ்பூன், கிவிப்பழம் - 2, புதினா இலைகள் - தேவையான அளவு. 

செய்முறை: கிவிப்பழத்தை நறுக்கவும். 4 கிவிப்பழ துண்டுகள், 4 தர்பூசணி துண்டுகள் இவற்றை எடுத்துத் தனியே வைக்கவும். மீதியுள்ள தர்பூசணி, கிவி, ஸ்ட்ராபெர்ரி, தயிர், சர்க்கரை ஆகியவற்றை மிக்ஸியில் நன்றாக அடித்து ஃப்ரிட்ஜில் குளிர வைத்து, கண்ணடி டம்ளர்களில் ஊற்றவும். ஒவ்வொரு டம்ளரிலும் ஒரு துண்டு கிவி, ஒரு துண்டு தர்பூசணி, ஒன்றிரண்டு புதினா இலை சேர்த்து அலங்கரிக்கவும்.

---

தர்பூசணி - ரோஜா டிரிங்க்

தேவையானவை: தர்பூசணி சாறு - ஒரு கப், ரோஸ் சிரப் - 3 டேபிள்ஸ்பூன், தண்ணீர் - ஒரு கப், ஐஸ்கட்டிகள் - தேவையான அளவு, சப்ஜா விதை - 2 டேபிள்ஸ்பூன்.

செய்முறை: சப்ஜா விதைகளை 2 மணி நேரம்  ஊறவைக்கவும். மற்ற எல்லாவற்றையும் (ஐஸ்கட்டிகள் நீங்கலாக) நன்றாகக் கலந்து, ஊறிய சப்ஜா விதைகள், ஐஸ்கட்டிகள் சேர்த்து சுவைக்கவும்.

---

தர்பூசணி குல்ஃபி

தேவையானவை: தோல், விதை நீக்கிய தர்பூசணித் துண்டுகள் - 4 கப், சர்க்கரை - 4 டேபிள்ஸ்பூன், க்ரீம் - 6 டேபிள்ஸ்பூன், ரோஸ் சிரப் - 2 டேபிள்ஸ்பூன், கோகோ பவுடர் - சிறிதளவு. 

செய்முறை: க்ரீமை பீட்டரில் (beater) போட்டு அடிக்கவும். தர்பூசணி, சர்க்கரையை மிக்ஸியில் போட்டு அடிக்கவும். இரண்டையும் கலந்து கோகோ பவுடர், ரோஸ் சிரப் சேர்த்துக் கலந்து குல்பி மோல்டில் ஊற்றி, `ஸ்டிக்’கை செருகி, இரவு முழுவதும் ஃப்ரிட்ஜில் (ஃப்ரீசர் பகுதியில்) வைத்திருந்து, மறுநாள் காலை எடுத்து சுவைக்கவும். 

---

தர்பூசணி - இஞ்சி பானம்

தேவையானவை: தோல், விதை நீக்கிய தர்பூசணித் துண்டுகள் - ஒரு கப், தோல் நீக்கி, மெல்லியதாக சீவிய இஞ்சித் துண்டுகள் - 5, எலுமிச்சைச் சாறு - 2 டேபிள்ஸ்பூன், சர்க்கரை - 4 டேபிள்ஸ்பூன், புதினா இலைகள் - 10, நறுக்கிய எலுமிச்சை வில்லைகள் - 2, ஐஸ்கட்டிகள் - தேவையான அளவு, உப்பு - சிறிதளவு.

செய்முறை: தர்பூசணித் துண்டுகள், இஞ்சித் துண்டுகள், உப்பு, சர்க்கரை ஆகியவற்றுடன் எலுமிச்சைச் சாறு சேர்த்து, மிக்ஸியில் அடிக்கவும். கிளாஸ்களில் 2, 3 ஐஸ்கட்டிகள் போட்டு, தர்பூசணி ஜூஸை ஊற்றி... புதினா இலைகள், எலுமிச்சை வில்லை கொண்டு  அலங்கரிக்கவும்.

---

தர்பூசணி அடை

தேவையானவை: தர்பூசணியின் வெள்ளை நிற தோல் பகுதி (சிவப்பு பகுதியை எடுத்துவிட்டு, பச்சைத் தோலை லேசாக சீவினால் கிடைப்பது) - ஒரு கப், புழுங்கல் அரிசி - 2 கப், துவரம்பருப்பு - 4 டேபிள்ஸ்பூன், தேங்காய்த் துருவல் - கால் கப், காய்ந்த மிளகாய் அல்லது பச்சை மிளகாய் - 2, நறுக்கிய கறிவேப்பிலை, கொத்தமல்லித்தழை - தலா ஒரு டேபிள்ஸ்பூன், எண்ணெய், உப்பு - தேவையான அளவு.

செய்முறை: புழுங்கல் அரிசி, துவரம்பருப்பு இரண்டையும் ஒன்றாக சேர்த்து ஒரு மணி நேரம் ஊறவைக்கவும். பிறகு, உப்பு, காய்ந்த மிளகாய் (அ) பச்சை மிளகாய் சேர்த்து கொரகொரப்பாக அரைக்கவும். தர்பூசணியின் வெள்ளை நிற தோல் பகுதியை துருவி, அரைத்த மாவுடன் சேர்த்து, தேங்காய்த் துருவலையும் சேர்க்கவும். இதனுடன் கறிவேப்பிலை, கொத்தமல்லித்தழை, உப்பு சேர்த்து நன்றாகக் கலக்கவும். தோசைக்கல்லை சூடாக்கி, மாவை  அடைகளாக ஊற்றி, ஓரங்களில் எண்ணெய் விட்டு, ஒருபுறம் வெந்ததும் திருப்பிப் போட்டு, வேகவிட்டு எடுக்கவும்.

---

தர்பூசணி சர்பத்

தேவையானவை: தோல், விதை நீக்கிய தர்பூசணித் துண்டுகள் - 2 கப், எலுமிச்சைச் சாறு - ஒரு டீஸ்பூன், ஏலக்காய்த்தூள், கறுப்பு உப்பு, சாட் மசாலா, மிளகுத்தூள் - தலா கால் டீஸ்பூன், சர்க்கரை - 8 டேபிள்ஸ்பூன், புதினா இலைகள் - 2 டேபிள்ஸ்பூன், ஐஸ்கட்டிகள் - தேவையான அளவு.

செய்முறை: புதினா இலைகளையும், ஐஸ்கட்டிகளையும் தனியே எடுத்து வைத்துக் கொள்ளவும். மற்ற அனைத்தையும் மிக்ஸியில் நன்றாக அடிக்கவும். கிளாஸ் டம்ளர்களில் ஐஸ்கட்டிகளைப் போட்டு, மேலே மிக்ஸியில் அடித்த சர்பத்தை ஊற்றி, சில புதினா இலைகளைத் தூவவும்.

---

தர்பூசணி ரசம்

தேவையானவை: புளித்தண்ணீர் - ஒரு கப், தர்பூசணி சாறு - 2 கப், வேகவைத்து மசித்த துவரம்பருப்பு - 2 டேபிள்ஸ்பூன், மஞ்சள்தூள், பெருங்காயத்தூள் - தலா கால் டீஸ்பூன், பொடித்த வெல்லம் - அரை டீஸ்பூன், மிளகாய்த்தூள் - ஒரு டீஸ்பூன், நறுக்கிய கொத்தமல்லித்தழை - 2 டேபிள்ஸ்பூன், உப்பு - தேவைக்கேற்ப.

வறுத்துப்பொடிக்க: நெய் - ஒரு டேபிள்ஸ்பூன், காய்ந்த மிளகாய் - ஒன்று, மிளகு, துவரம்பருப்பு, மல்லி (தனியா) - தலா ஒரு டீஸ்பூன்

தாளிக்க: நெய், கடுகு - தலா ஒரு டீஸ்பூன், சீரகம் - அரை டீஸ்பூன், கறிவேப்பிலை - ஒரு ஆர்க்கு.

செய்முறை: வாணலியில் நெய் விட்டு, வறுக்கக் கொடுத்துள்ள பொருட்களை வறுத்து, மிக்ஸியில் கொரகொரப்பாகப் பொடிக்கவும். ஒரு பாத்திரத்தில் புளித்தண்ணீர் ஊற்றி மிளகாய்த்தூள், மஞ்சள்தூள், உப்பு, வெல்லம் சேர்த்து ஒரு கொதி வந்ததும், வறுத்துப் பொடித்ததை சேர்க்கவும். மீண்டும் ஒரு கொதி வந்ததும் மசித்தபருப்பை 2 டேபிள்ஸ்பூன் தண்ணீர் விட்டுக் கரைத்துச் சேர்க்கவும். பின்னர் ஒரு கொதி வந்ததும் தர்பூசணி சாற்றை ஊற்றி, தாளிக்கக் கொடுத்தவற்றைத் தாளித்துச் சேர்த்து, பெருங்காயத்தூள் சேர்த்து... ஒரு கொதி வந்ததும் இறக்கி, கொத்தமல்லித்தழை தூவி அலங்கரிக்கவும்.

---

தர்பூசணி தோல் பொரியல்

தேவையானவை: நீளவாக்கில் மெல்லியதாக நறுக்கிய தர்பூசணியின் வெள்ளைத் தோல் பகுதி (சிவப்பு பகுதியை எடுத்துவிட்டு, பச்சைத் தோலை லேசாக சீவினால் கிடைப்பது) - ஒரு கப், சீரகம் - அரை டீஸ்பூன், இஞ்சி - பூண்டு விழுது - ஒரு டீஸ்பூன், மல்லித்தூள் (தனியாத்தூள்) - ஒரு டீஸ்பூன், மஞ்சள்தூள் - கால் டீஸ்பூன், மிளகாய்த்தூள் - ஒரு டீஸ்பூன், ஆம்சூர் பவுடர் - ஒரு டீஸ்பூன், பச்சை மிளகாய் - ஒன்று, நெய் - ஒரு டீஸ்பூன், எண்ணெய் - ஒரு டேபிள்ஸ்பூன், நறுக்கிய கொத்தமல்லித்தழை - 2 டேபிள்ஸ்பூன், உப்பு - தேவைக்கேற்ப.  

செய்முறை: அடிகனமான வாணலியில் எண்ணெய், நெய், இரண்டையும் ஊற்றி சீரகம் தாளித்து, நறுக்கிய பச்சை மிளகாய் சேர்த்து வதக்கவும். இதனுடன் இஞ்சி - பூண்டு விழுது சேர்த்து வதக்கி... மல்லித்தூள் (தனியாத்தூள்), மிளகாய்த்தூள், மஞ்சள்தூள், ஆம்சூர் பவுடர், உப்பு சேர்த்துக் கிளறி, நறுக்கிய தர்பூசணி வெள்ளைத் தோலையையும் சேர்த்து மேலும் வதக்கவும். கால் கப் நீர் ஊற்றிக் கிளறி, எல்லாமாகச் சேர்ந்து வெந்ததும் கொத்தமல்லித்தழை தூவி இறக்கவும்.

---

தர்பூசணி ஸ்மூத்தி

தேவையானவை: தோல், விதை நீக்கிய தர்பூசணித் துண்டுகள் - இரண்டரை கப், தேங்காய்ப்பால் - அரை கப், வாழைப்பழம் - ஒன்று (துண்டுகளாக்கவும்), வெனிலா ஐஸ்க்ரீம் - ஒரு கப், சர்க்கரை - 4 டேபிள்ஸ்பூன், தர்பூசணி ஐஸ்கட்டிகள் - தேவையான அளவு (தர்பூசணி சாற்றை ஐஸ் ட்ரேயில் ஊற்றி ஃப்ரீசரில் வைத்து எடுக்கவும்)

செய்முறை: தர்பூசணித் துண்டுகள், தேங்காய்ப்பால், சர்க்கரை ஆகியவற்றை மிக்ஸியில் அடித்து... ஐஸ்க்ரீம், வாழைப்பழம் சேர்த்துக் கலக்கவும். இதை கண்ணாடி டம்ளர்களில் ஊற்றி மேலே தர்பூசணி ஐஸ்கட்டிகளை மிதக்கவிடவும்.

---

கார்பூஜா ரசாயனா

தேவையானவை: தோல் சீவி, நறுக்கிய கிர்ணிப்பழத் துண்டுகள் - ஒரு கப், தேங்காய்த் துருவல் - அரை கப், துருவிய வெல்லம் - கால் கப், அவல் - கால் கப், ஏலக்காய்த்தூள் - கால் டீஸ்பூன்.

செய்முறை: கிர்ணிப்பழத் துண்டுகளை அரை மணி நேரம் ஃப்ரிட்ஜில் வைக்கவும். தேங்காய்த் துருவலை அரைத்துப் பால் எடுக்கவும். தேங்காய்ப்ப் பாலுடன் துருவிய வெல்லம், அவல், ஏலக்காய்த்தூள் சேர்க்கவும். ஊறியதும், ஃப்ரிட்ஜில் இருந்து கிர்ணிப்பழத் துண்டுகளை எடுத்து சேர்க்கவும். 

இது, ராஜஸ்தானில் மிகவும் பிரசித்தி பெற்ற டிஷ்.

---

கிர்ணிப்பழ லஸ்ஸி

தேவையானவை: தோல் சீவி, நறுக்கிய கிர்ணிப்பழத் துண்டுகள் - ஒரு கப், பன்னீர் - ஒரு டேபிள்ஸ்பூன், சர்க்கரை - 3 டேபிள்ஸ்பூன், புளிக்காத புதிய தயிர் - ஒரு கப், ஐஸ் கட்டிகள் - தேவையான அளவு.

செய்முறை: கொடுக்கப் பட்டுள்ள எல்லாவற்றையும் (ஐஸ்கட்டிகள் நீங்கலாக) சேர்த்து மிக்ஸியில் அடித்து கிளாஸ்களில் ஊற்றி, ஐஸ் கட்டிகளை மிதக்கவிட்டுப் பருகவும்.

---

கிர்ணிப்பழ மில்க் ஷேக்

தேவையானவை: தோல் சீவி, நறுக்கிய கிர்ணிப்பழத் துண்டுகள் - ஒரு கப், காய்ச்சி, ஆறவைத்த பால் - 2 கப், சர்க்கரை - 8 டேபிள்ஸ்பூன், தேன் - ஒரு டீஸ்பூன், வெனிலா ஐஸ்க்ரீம் - 4 டேபிள்ஸ்பூன்.

செய்முறை: கிர்ணிப்பழத் துண்டுகள், பால், சர்க்கரை, தேன் ஆகியவற்றை மிக்ஸியில் அடித்து, வெனிலா ஐஸ்க்ரீமையும் சேர்த்துப் பரிமாறவும்.

---

நுங்கு கீர்

தேவையானவை: தோல் நீக்கி, துண்டுகளாக்கிய பனை நுங்கு - 2 கப், பால் - அரை லிட்டர், கண்டன்ஸ்டு மில்க் - 2 டேபிள்ஸ்பூன், சர்க்கரை - அரை கப், சாரைப்பருப்பு - ஒரு டேபிள்ஸ்பூன், ஏலக்காய்த்தூள் - அரை டீஸ்பூன்.

செய்முறை: பாதி அளவு நுங்கை சிறுசிறு துண்டுகளாக்கிக்கொள்ளவும். மீதி நுங்கை மிக்ஸியில் அரைத்துக்கொள்ளவும். அடி கனமான பாத்திரத்தில் பாலை ஊற்றி, சர்க்கரை சேர்த்துக் கலந்து கொதிக்கவிடவும். பாதியாகச் சுண்டியதும் கண்டன்ஸ்ட்டு மில்க் சேர்த்து இறக்கி ஆறவிட்டு ஃப்ரிட்ஜில் வைக்கவும். குளிர்ந்ததும் அரைத்த நுங்கு விழுது, துண்டுகளாக்கிய நுங்கு சேர்த்துக் கலந்து, ஏலக்காய்த்தூள், சாரைப்பருப்பு சேர்த்துப் பருகலாம்.

---

 நுங்கு சர்பத்

தேவையானவை: தோல் நீக்கி, துண்டுகளாக்கிய பனை நுங்கு - ஒரு கப், நன்னாரி சிரப் (மளிகைக் கடைகளில் கிடைக்கும்) - 3 டேபிள்ஸ்பூன்  ஏலக்காய்த்தூள் - ஒரு டீஸ்பூன், ஐஸ்கட்டிகள் - தேவையான அளவு.

செய்முறை: நுங்கை மிக்ஸியில் அடித்து ஏலக்காய்த்தூள் சேர்த்து, நன்னாரி சிரப்பையையும் சேர்த்துக் கலக்கவும். இதனுடன் ஒரு கப் நீர் சேர்த்து, ஐஸ்கட்டிகளையும் சேர்த்து (தேவைப்பட்டால் கொஞ்சம் சர்க்கரை சேர்த்துக்கொள்ளலாம்) நீளமான கண்ணாடிக் குவளைகளில் ஊற்றிச் சுவைக்கவும்.

குறிப்பு: நன்னாரி சிரப் இல்லாவிட்டால், நாட்டு மருந்து கடையில் நன்னாரி வேரை வாங்கி 4, 5 துண்டுகளை ஒரு கப் நீர் விட்டு கொதிக்கவிடவும். அது அரை கப் ஆக வற்றியதும் இறக்கி, ஆறியதும் வடிகட்டி, தேவையான சர்க்கரை சேர்த்து  உபயோகிக்கலாம்.

---

நுங்கு - கிர்ணி கஸ்டர்ட்

தேவையானவை: தோல் நீக்கி, துண்டுகளாக்கிய நுங்கு - அரை கப், தோல் சீவி, நறுக்கிய கிர்ணிப்பழத் துண்டுகள் - கால் கப், துண்டுகளாக நறுக்கிய இளநீர் வழுக்கை - 4 டேபிள்ஸ்பூன், பால் - 2 கப், வெனிலா கஸ்டர்ட் பவுடர் (டிபார்ட்மென்ட் கடைகளில் கிடைக்கும்) - 2 டேபிள்ஸ்பூன், பாதாம், பிஸ்தா - தலா 6 (ஊறவைக்கவும்), சர்க்கரை - கால் கப்.

செய்முறை: பாதாம், பிஸ்தா இரண்டையும் நைஸாக அரைக்கவும். பாலை அடி கனமான பாத்திரத்தில் ஊற்றி, சர்க்கரை சேர்த்துக் கொதிக்கவிடவும். மிதமான சூடு வந்ததும் கால் கப் பாலைத் தனியாக எடுத்து வைத்துக்கொண்டு, மீதி கொதிக்கும் பாலில் அரைத்த பாதாம் - பிஸ்தா விழுதை சேர்க்கவும். ஒரு கொதி வந்ததும் கால் கப் பாலில் கஸ்டர்ட் பவுடரைக் கரைத்து கொதிக்கும் பாலில் ஊற்றி ஓரிரு கொதிகள் வந்ததும் இறக்கவும். ஆறியதும் ஃப்ரிட்ஜில் வைக்கவும். அரை மணி நேரத்துக்குப் பிறகு எடுத்து, துண்டுகளாக்கிய நுங்கு, கிர்ணிப்பழம், இளநீர் வழுக்கை சேர்த்துக் கலந்து பரிமாறவும்.

---

வெள்ளரி ராய்த்தா

தேவையானவை: மெல்லியதாக நறுக்கிய வெள்ளரிப் பிஞ்சு - அரை கப், கெட்டித் தயிர் - ஒரு கப், தேங்காய்த் துருவல் - கால் கப், பச்சை மிளகாய் - ஒன்று, நறுக்கிய கொத்தமல்லித்தழை - ஒரு டேபிள்ஸ்பூன், கடுகு - ஒரு டீஸ்பூன், கறிவேப்பிலை - ஒரு ஆர்க்கு, எண்ணெய் - ஒரு டீஸ்பூன், உப்பு - தேவைக்கேற்ப. 

செய்முறை: ஒரு பாத்திரத்தில் தயிரையும் உப்பையும் சேர்க்கவும். தேங்காய்த் துருவல், பச்சை மிளகாயை விழுதாக அரைத்து தயிருடன் சேர்க்கவும். நறுக்கிய வெள்ளரிப் பிஞ்சையும் சேர்க்கவும். கடுகு, கறிவேப்பிலையை எண்ணெயில் தாளித்துச் சேர்த்து, நறுக்கிய கொத்தமல்லித்தழையை தூவி அலங்கரிக்கவும்.

இந்த வெள்ளரி ராய்த்தாவை அப்படியே சாப்பிடலாம். கலந்த சாதத்துக்கும் தொட்டுக்கொள்ளலாம்.

---

வெள்ளரிப் பிஞ்சு சாட்

தேவையானவை: பொடியாக நறுக்கிய வெள்ளரிப் பிஞ்சு - அரை கப், அரிசிப்பொரி - 6 டேபிள்ஸ்பூன், பெரிய வெங்காயம் - ஒன்று (நறுக்கவும்), பொடியாக நறுக்கிய மாங்காய் - 4 டேபிள்ஸ்பூன், தக்காளி - ஒன்று, பொடியாக நறுக்கிய குடமிளகாய் - 4 டேபிள்ஸ்பூன், மிளகாய்த்தூள் - ஒரு டீஸ்பூன், பெருங்காயத்தூள் - ஒரு சிட்டிகை, கறிவேப்பிலை - ஒரு ஆர்க்கு, நறுக்கிய கொத்தமல்லித்தழை - ஒரு டேபிள்ஸ்பூன், எண்ணெய் - ஒரு டேபிள்ஸ்பூன், உப்பு - தேவைக்கேற்ப. 

செய்முறை: வாணலியில் எண்ணெய் விட்டு... வெங்காயம், பெருங்காயத்தூள், உப்பு, கறிவேப்பிலை, மிளகாய்த்தூள் சேர்த்துக் கிளறி, தக்காளி சேர்த்து வதக்கி அடுப்பை அணைத்துவிடவும். அந்த சூட்டிலேயே குடமிளகாய், அரிசிப்பொரி, மாங்காய் சேர்த்து, இறுதியில் வெள்ளரிப்பிஞ்சையும், கொத்தமல்லித்தழையையும் சேர்த்துக் கலந்து பரிமாறவும்.

---

வெள்ளரி -  தக்காளி சாலட்

தேவையானவை: தோல் சீவி, நறுக்கிய வெள்ளரித் துண்டுகள் - ஒரு கப், சிறியதாக நறுக்கிய தக்காளி - கால் கப், மிளகுத்தூள் - ஒரு டீஸ்பூன், நறுக்கிய  கொத்தமல்லித்தழை - ஒரு டேபிள்ஸ்பூன், உப்பு - தேவைக்கேற்ப.

செய்முறை: ஒரு பாத்திரத்தில் நறுக்கிய வெள்ளரி, தக்காளி, மிளகுத்தூள், உப்பு சேர்த்து  நன்றாக கலந்து, கொத்தமல்லித்தழை தூவி பரிமாறவும்.

---

வெள்ளரி - வெங்காய சாலட்

தேவையானவை: வட்டமாக நறுக்கிய வெள்ளரி - ஒரு கப், வெங்காயம், தக்காளி - தலா ஒன்று (வட்டமாக நறுக்கவும்), மிளகாய்த்தூள் - அரை டீஸ்பூன், மிளகுத்தூள் - ஒரு டீஸ்பூன், எலுமிச்சைச் சாறு - 2 டீஸ்பூன், உப்பு - தேவைக்கேற்ப. 

செய்முறை: கொடுக்கப் பட்டுள்ள அனைத்தையும் ஒரு பாத்திரத்தில் சேர்த்து நன்றாகக் கலக்கவும்.

குறிப்பு: கொத்தமல்லித் தழையையும் இதனுடன் சேர்க்கலாம்.

---

வெள்ளரி தயிர் பச்சடி

தேவையானவை: வெள்ளரிக்காய் - ஒன்று, முள்ளங்கி - 2, கேரட் - ஒன்று, கெட்டித் தயிர் - ஒரு கப், பெரிய வெங்காயம் - ஒன்று, பச்சை மிளகாய் - 2, இஞ்சி - சிறிய துண்டு, கெட்டி அவல் - 2 டேபிள்ஸ்பூன், கடுகு - ஒரு டீஸ்பூன், கறிவேப்பிலை - ஒரு ஆர்க்கு, எண்ணெய் - ஒரு டேபிள்ஸ்பூன், உப்பு - தேவைக்கேற்ப.

செய்முறை: கேரட் துருவியில் வெள்ளரியைத் தோலுடன் துருவி தனியே வைக்கவும். கேரட், முள்ளங்கியையும் துருவி வைக்கவும். வாணலியில் எண்ணெய் விட்டு கடுகு, கறிவேப்பிலை தாளித்து... துருவிய முள்ளங்கியை சேர்த்து வதக்கி, ஆறவிடவும். ஒரு பாத்திரத்தில் தயிர், உப்பு, அவல் சேர்த்து, நறுக்கிய வெங்காயம், பொடியாக நறுக்கிய பச்சை மிளகாய், தோல் சீவி, நறுக்கிய இஞ்சி சேர்க்கவும். இதனுடன் கேரட் துருவல், வெள்ளரித் துருவல், வதக்கிய முள்ளங்கித் துருவல் கலவை ஆகியவற்றை சேர்க்கவும். எண்ணெயில் கடுகு, கறிவேப்பிலை தாளித்து சேர்த்துக் கலந்துவிடவும்.

---

இளநீர் - கல்கண்டு பானம்

தேவையானவை: இளநீர் - முக்கால் கப், இளநீர் வழுக்கை - கால் கப், எலுமிச்சைச் சாறு - ஒரு டேபிள்ஸ்பூன், இஞ்சி - சிறு துண்டு, கல்கண்டு - 75 கிராம்.

செய்முறை: இளநீர், இளநீர் வழுக்கை இரண்டையும் மிக்ஸியில் அடித்து, தோல் சீவி நசுக்கிய இஞ்சியையும், பொடித்த கல்கண்டையும் சேர்த்து, ஃப்ரிட்ஜில் 3 மணி நேரம் வைக்கவும். பிறகு, வடிகட்டி இஞ்சியை எடுத்துவிட்டு, எலுமிச்சைச் சாறு சேர்த்துக் கலந்து சுவைக்கவும்.

---

இளநீர் - பைனாப்பிள் ஜூஸ்

தேவையானவை: இளநீர் - 2 கப், இளநீர் வழுக்கை - ஒரு கப், பைனாப்பிள் துண்டுகள் - 2 கப், சுகர் சிரப் - 4 டேபிள்ஸ்பூன், ஐஸ்கட்டிகள் - தேவையான அளவு.

செய்முறை: இளநீர் வழுக்கை, பைனாப்பிள் துண்டுகள், சுகர் சிரப் மூன்றையும் மிக்ஸியில் அடித்து, இளநீர் சேர்த்துக் கலக்கவும். இதை கிளாஸ்களில் ஊற்றி ஐஸ்கட்டிகளைச் சேர்த்துப் பரிமாறவும்.

---

வெள்ளரிக்காய் கூட்டு

தேவையானவை: வெள்ளரிக்காய் - 2, வேகவைத்த பயத்தம்பருப்பு - 4 டேபிள்ஸ்பூன், மஞ்சள்தூள் - கால் டீஸ்பூன், உப்பு - தேவைக்கேற்ப.

அரைக்க: தேங்காய்த் துருவல் - 4 டேபிள்ஸ்பூன், பச்சை மிளகாய் - ஒன்று, கறிவேப்பிலை - 3 இலைகள், சீரகம் - அரை டீஸ்பூன், நறுக்கிய கொத்தமல்லித்தழை - அரை டேபிள்ஸ்பூன்

தாளிக்க: தேங்காய் எண்ணெய் - ஒரு டீஸ்பூன், கடுகு, உளுத்தம்பருப்பு - தலா ஒரு டீஸ்பூன், காய்ந்த மிளகாய் - ஒன்று.

செய்முறை: அரைக்கக் கொடுத்தவற்றை மிக்ஸியில் நைஸான விழுதாக அரைக்கவும். ஒரு பாத்திரத்தில் அரை கப் நீர் விட்டு உப்பு, மஞ்சள்தூள் சேர்த்து, நறுக்கிய வெள்ளரியையும்  சேர்த்து வேகவிடவும் (விரைவில் வெந்துவிடும்). பிறகு, வேகவைத்த பயத்தம்பருப்பு, அரைத்த விழுது சேர்த்து ஓரிரு கொதிகள் வந்ததும், தாளிக்கக் கொடுத்தவற்றைத் தாளித்துச் சேர்த்து இறக்கவும்.

---

கிர்ணிப்பழ டேங்கோ

தேவையானவை: தோல் சீவி, நறுக்கிய கிர்ணிப்பழத் துண்டுகள் - 2 கப், ஆரஞ்சு சுளைகள் - 8, இளநீர் - 2 கப், சர்க்கரை - 2 டேபிள்ஸ்பூன், கறுப்பு உப்பு - அரை டீஸ்பூன், புதினா இலைகள், ஐஸ்கட்டிகள் - தேவையான அளவு. 

செய்முறை: ஆரஞ்சு சுளைகளை தோல், விதை நீக்கி மிக்ஸியில் அடித்து, அந்த ஜூஸை ஐஸ் ட்ரேயில் ஊற்றி, ஃப்ரீசரில் உறைய வைக்கவும். கிர்ணிப்பழம், இளநீர், சர்க்கரை, கறுப்பு உப்பு ஆகியவற்றை மிக்ஸியில் அடித்து கிளாஸ்களில் ஊற்றி, ஆரஞ்சு ஐஸ்கட்டிகளை மிதக்கவிடவும். புதினா இலைகளை மேலே தூவவும்.

---

ட்ரிபிள் ஷாட் பானம்

தேவையானவை: பைனாப்பிள்பழத் துண்டுகள் - ஒரு கப், தோல் சீவி, நறுக்கிய கிர்ணிப்பழத் துண்டுகள் - 2 கப், இளநீர் - ஒன்றரை கப், உப்பு - சிறிதளவு, ஐஸ்கட்டிகள் - தேவையான அளவு.

செய்முறை: கொடுக்கப்பட்டுள்ள அனைத்தையும் மிக்ஸியில் அடித்து கிளாஸ்களில் ஊற்றி, ஐஸ் கட்டிகள் சேர்த்து சுவைக்கவும் (தேவைப்பட்டால் கொஞ்சம் சர்க்கரை சேர்த்துக்கொள்ளலாம்).

---

இளநீர் - வெனிலா டிரிங்க்

தேவையானவை: இளநீர் - ஒன்றரை கப், பைனாப்பிள் துண்டுகள் - ஒரு கப், ஐசிங் சுகர் - ஒரு டீஸ்பூன், வெனிலா ஐஸ்க்ரீம் - 2 டேபிள்ஸ்பூன், உப்பு - சிறிதளவு, ஐஸ்கட்டிகள் - தேவையான அளவு.

செய்முறை: மிக்ஸியில் முதலில் பைனாப்பிள் துண்டுகளைப் போட்டு அடித்து... பிறகு, இளநீர், ஐசிங் சுகர், உப்பு, வெனிலா ஐஸ்க்ரீம் சேர்த்து அடித்து, எல்லாவற்றையும் நன்கு கலந்துவிடவும். நீளமான கண்ணாடிக் குவளைகளில் ஊற்றி, ஐஸ்கட்டிகள் சேர்த்து சுவைக்கவும்.

---

இளநீர் - எலுமிச்சை கூலர்

தேவையானவை: இளநீர் - 2 கப், தோல், விதை நீக்கிய தர்பூசணித் துண்டுகள் - 2 கப், எலுமிச்சைப் பழம் - 2, சர்க்கரை - 3 டேபிள்ஸ்பூன், புதினா இலைகள் - தேவையான அளவு, இஞ்சி - ஒரு சிறிய துண்டு.

செய்முறை: ஒரு கப் தர்பூசணித் துண்டுகளை மிக்ஸியில் அடித்து ஜூஸாக்கி, ஐஸ் ட்ரேயில் ஊற்றி ஒவ்வொரு குழியின் மேலேயும் ஒரு புதினா இலையை வைத்து, ஃப்ரீசரில் உறைய வைக்கவும். மீதியுள்ள ஒரு கப் தர்பூசணித் துண்டுகள், தோல் சீவிய இஞ்சி, இளநீர், சர்க்கரை, எலுமிச்சைச் சாறு ஆகியவற்றை மிக்ஸியில் அடித்து, வடிகட்டவும். இதை கண்ணாடி டம்ளர்களில் ஊற்றி மேலே புதினா வைத்த தர்பூசணி ஐஸ்கட்டிகளை மிதக்கவிட்டு, பரிமாறவும்.  

---

இளநீர் - பப்பாளிப்பழ ஜூஸ்

தேவையானவை: இளநீர் - ஒன்றரை கப், இளநீர், வழுக்கை - ஒரு கப்,  தோல் சீவி, நறுக்கிய பப்பாளிப் பழத் துண்டுகள் - ஒரு கப், ஐஸ்கட்டிகள் - தேவையான அளவு.

செய்முறை: முதலில் பப்பாளித் துண்டுகளை மிக்ஸியில் அடித்து, பிறகு இளநீர் வழுக்கையை சேர்த்து அடித்து, கடைசியாக இளநீரையும் சேர்த்து ஒரு சுற்று சுற்றி, எல்லாவற்றையும் நன்கு கலக்கவும். கண்ணாடி டம்ளர்களில் ஊற்றி, ஐஸ் கட்டிகள் சேர்த்து சுவைக்கவும் (தேவைப்பட்டால், கொஞ்சம் சர்க்கரை சேர்த்துக்கொள்ளலாம்).

டாய்லெட் ஹைஜீன்

மனிதனுக்குப் பல்வேறு நோய்கள் வர முக்கியக் காரணமே சுத்தமின்மைதான். எல்லாவற்றிலும் சுத்தம் பார்க்கும் நாம், கவனக்குறைவாக இருப்பது கழிப்பறை சுத்தத்தில்தான். “இதெல்லாம் பெரிய விஷயமா?” என்று அசட்டையாக விட்டதால்தான் அந்தக் காலத்தில் காலரா முதல் ஏராளமான கொள்ளைநோய்கள் ஏற்பட்டு, கொத்துக்கொத்தாக உயிரிழந்தனர். வளர்ந்த நாடுகளில் குழந்தைகளுக்கு கழிப்பறையை எப்படிப் பயன்படுத்த வேண்டும் என்பதைச் சொல்லித்தருகிறார்கள். நமது நாட்டில் “இதை எல்லாமா சொல்லித்தருவார்கள்?” எனக் கழிப்பறை சுத்தம் பற்றிப் பலரும் பேசத் தயங்குவதால், அங்கிருந்து கிருமிகள் பல்கிப் பெருகி, பல்வேறு நோய்களைப் பரப்புகின்றன. நமது ஊரில் பொதுக் கழிப்பறையின் நிலை மிகவும் மோசமாக இருக்க, மக்களும் ஒரு காரணம். நம் வீட்டுக் கழிப்பறையாக இருந்தாலும், பள்ளி, கல்லூரி, அலுவலகம் மற்றும் பொது இடங்களில் இருக்கும் கழிப்பறையாக இருந்தாலும் சுத்தமாக வைத்துக்கொள்வது நம் ஒவ்வொருவரின் பொறுப்பு.

கழிப்பறையைக் கட்டும்போது கவனிக்க வேண்டியவை

காற்று வெளியே செல்லும் அளவுக்குக் காற்றோட்டமான வென்டிலேட்டர் இருக்க வேண்டும்.

கழிப்பறையில் பயன்படுத்திய நீர் வெளியேறும் வகையில், சிறப்பான கழிவு நீர் வழித்தடங்களை அமைக்க வேண்டும்.

மலம், சிறுநீர் கழிக்கத் தனி அறையும், குளியலுக்குத் தனி அறையும் அமைப்பதுதான் நல்லது.

ஒருவேளை இரண்டும் ஒரே அறையில் இருந்தால், கழிப்பறைக்கும் குளியலறைக்கும் இடையே ஒரு தடுப்புச் சுவர் அமைப்பது நல்லது.

கழிப்பறைக்கு அருகில் சமையல் அறை அமைப்பதைத் தவிர்க்க வேண்டும்.

கழிப்பறையில் ஒரு குப்பைத் தொட்டி வைக்க வேண்டும்.

கழிப்பறையைக் கழுவுங்கள் 
குறைந்தபட்சம் மூன்று நாட்களுக்கு ஒரு முறையாவது 15 நிமிடங்கள் செலவுசெய்து கழிப்பறை முழுதையும் சுத்தம்செய்வது அவசியம். கழிப்பறையைச் சுத்தம் செய்வதற்காகக் கடையில் விற்கப்படும் பிரத்யேகத் திரவங்கள் அல்லது பிளீச்சிங் பவுடர்கள் பயன்படுத்தலாம். திரவமாக இருந்தாலும், பிளீச்சிங் பவுடராக இருந்தாலும், தண்ணீரில் கலந்து தெளித்து, பிரஷ் மூலம் தேய்த்துக் கழுவ வேண்டும். அதிக அளவு பிளீச்சிங் பவுடரைப் பயன்படுத்தினால், பாக்டீரியா அதை எதிர்கொள்ளும் சக்தியைப் பெற்றுவிடும். எனவே, ஒவ்வொரு வாரமும் இரண்டு முறை சீராகக் கழிப்பறையைச் சுத்தம் செய்துவந்தாலே போதுமானது.

வீட்டிலேயே ஆன்டிபாக்டீரியல் ஸ்ப்ரே செய்வது எப்படி?

இரண்டு கப் தண்ணீர், கால் கப் டெட்டால் சொல்யூஷன், ஒரு ஸ்பூன் யூகலிப்டஸ் எண்ணெய் மூன்றையும் சேர்த்து, நன்றாகக் கலக்கி ஒரு ஸ்ப்ரே பாட்டிலில் நிரப்பிக்கொள்ளவும். வெஸ்டர்ன் கழிப்பறைகளில் அமரும் இடத்தில் இந்த ஸ்ப்ரேவை அடிக்க வேண்டும். பின்னர், சுத்தமான பருத்தித் துணியால் துடைத்துவிடலாம்.

கழிப்பறையைப் பயன்படுத்திய பின்னர் செய்ய வேண்டியவை என்னென்ன?

கை, கால்கள் மற்றும் சிறுநீர், மலம் கழித்த உறுப்புகளைத் தண்ணீரால் நன்றாகச் சுத்தம்செய்ய வேண்டும்.
சோப் அல்லது கிருமிநாசினி பயன்படுத்தி, மீண்டும் ஒரு முறை விரல் இடுக்குகளைச் சுத்தம்செய்ய வேண்டும்.

கழிப்பறையில் இருக்கும் டேப்பை, தண்ணீர் பயன்படுத்திச் சுத்தம் செய்ய வேண்டும்.

கழிப்பறையை விட்டு வெளியே வரும் முன், கை,கால்களின் ஈரத்தைத் தூயப் பருத்தித் துணி அல்லது டிஷ்யூ பேப்பரால் நன்கு துடைக்க வேண்டும்.

டிஷ்யூ பேப்பர்களைச் சரியாகக் குப்பைத் தொட்டியில் போட வேண்டும்.

கழிப்பறையில் என்னென்ன பாக்டீரியா இருக்கின்றன?

நன்கு சுத்தமான கழிப்பறையில் ஒரு சதுர இன்ச் பரப்பில் குறைந்தது 50 பாக்டீரியா இருக்கிறதாம். சரியான பராமரிப்பு இல்லை என்றால் எவ்வளவு இருக்கும் என்று கணக்கிட்டுக்கொள்ளுங்கள். கழிப்பறையில் பல வகையான பாக்டீரியா இருந்தாலும், அதில் மிக முக்கியமானவை...

மூளையின் நேரம் காலை 11 மணி!

''இயற்கைக்கு எதிராக நாம் செயல்படும்போதுதான், நம் உடலில் பிரச்னைகள் ஏற்படுகின்றன. உடலின் வெப்பமும், வானிலையும் ஒன்றையொன்று சார்ந்தே இருக்கும். நம் உடலை இயக்கும் உறுப்புகளின் நேரத்தை நாம் அறிந்து கொண்டால் உணவு, தூக்கம், வேலை போன்றவற்றை சரியான நேரத்தில் செய்து ஆரோக்கியமான வாழ்க்கை முறையை பின்பற்றலாம்" என்கிறார் இயற்கை மருத்துவர் கீர்த்தனா.
 
காலை 3-5 - நுரையீரலின் நேரம்

இந்த நேரத்தில் ஒசோன் அதிகமாக இருக்கும். இது உடலுக்கு பலவித நன்மைகளைத் தரக்கூடியது. இந்த நேரத்தில் கிடைக்கும் ஆற்றல், உணவின் மூலம் கிடைப்பதைவிட சிறப்பானது. மூச்சு பயிற்சிகள், தியானம் செய்ய சரியான நேரம். வெளியில் நின்று வானிலையை ரசித்து வெறும் மூச்சை கவனித்தாலே போதும் அன்றைய நாள்முழுவதும் தேவைப்படுகிற ஆற்றலை தந்துவிடும். நுரையீரல் பலம் பெறும்.  
 
காலை 5-7 - பெருங்குடலின் நேரம்

பெருங்குடலை சுத்தம் செய்து சிறுநீர், மலம் கழிப்பதற்கான சிறப்பான நேரம் இது. 7 மணிக்குள் மலம் கழித்துவிடும்படி நம் உடலை தயார் செய்துக் கொண்டால் எந்த நோயும் அருகில் வராது. கழிவுகள் வெளியேற்றப்பட்டால் உடல் சுத்தமாகும். உடலும், மனமும் ஆரோக்கியம் பெறும்.
 
காலை 7-9 - வயிற்றின் நேரம்

காலை 8 மணிக்குள், உணவை சாப்பிட்டு விட வேண்டும்.  9 மணிக்குள் உணவு செரிமானமாகும். இந்த நேரத்தில் வயிற்றுக்கு வேலை கொடுப்பதுதான் சரி. நேரம் கடந்து செல்லும் போது மற்ற உறுப்புகளின் இயக்கமும் சேர்த்து தடைபடும். அதாவது, சுழற்சி பாதிக்கப்படும்.
 
காலை 9-11 - மண்ணீரலின் நேரம்

இந்த நேரத்தில் அதிகமான உடலுழைப்பு தரக்கூடாது. திரவ உணவுகளை சாப்பிட வேண்டாம். அன்றாட வேலையை மட்டும் கவனித்தால் போதும். 11 மணிக்கு மேல் திரவ உணவுகளை எடுத்துக் கொள்ளலாம்.
 
காலை 11-1 - மூளையின் நேரம்

மூளைக்கு வேலை தந்து, புத்தியை சிறப்பாக செயல்படுத்த வேண்டிய நேரம். உடலுழைப்பு குறைவாக செய்ய வேண்டும். 
 
மதியம் 1-3 - சிறுகுடலின் நேரம்

மதிய உணவை முடித்திருக்க வேண்டும். இந்த நேரத்தில் உணவை செரிக்கக் கூடிய உறிஞ்சும் தன்மை (absorption) அதிகமாக சுரக்கும். உணவு செரிமானமாகி அவை உடலில் கிரகிக்க உதவும்.

மாலை 3-5 - சிறுநீர்ப்பையின் நேரம்

இந்த நேரத்தில் சிறுநீர்ப்பை நன்றாக இயங்கத் தொடங்கும். அன்றைய நாளின் கழிவை உடலிருந்து எடுத்து, சிறுநீர்ப்பையில் தேக்கி வைக்கும். அதுபோல பித்த பையும் அதன் வேலையை செய்து கொண்டிருக்கும்.
 
மாலை 5-7 - சிறுநீரகத்தின் நேரம்

இளஞ்சூடான உணவுகள், திரவ உணவுகளை சாப்பிடலாம். போதுமான நீரும் அருந்தலாம். உடலுழைப்பு தரக் கூடிய பயிற்சிகளையும் செய்யலாம்.
  
இரவு 7-9 - இதயப்பை, இதய உறையின் நேரம்

இதயப்பைக்கு ஒய்வு தருவது அவசியம். அன்றைய நாள் முழுவதும் நம் உடலுழைப்புக்கு ஏற்றவாறு செயல்பட்டுக் கொண்டிருந்த இதயம் மற்றும் இதயம் சார்ந்த பகுதிகள் ஓய்வெடுக்கும் நேரம். இந்த நேரத்தில் உணர்வுகள் தொடர்பான செயல்களை செய்யக் கூடாது. குறிப்பாக, நாடகம் பார்ப்பது, டென்ஷன், பதற்றம், அழுகை, கோபம், எரிச்சல் போன்ற உணர்வுகளை தவிர்க்க வேண்டும்.
 
இரவு 9-11 - மனம் தொடர்பான நேரம் (triple warmer)

இந்த நேரத்தில் மனம் அமைதியாக இருக்க வேண்டும். எண்ண ஒட்டங்கள் குறைந்து சாந்தமான நிலையில் உறங்க முயற்சிக்கலாம்.  உடலின் வெப்பத்தை சமன் செய்வதற்கு உடல் முயற்சித்துக் கொண்டிருக்கும்.
 
இரவு 11-1 - கல்லீரலின் நேரம், 1-3 பித்தப்பையின் நேரம்:

இது தூங்குவதற்கு ஏற்ற நேரம். அதாவது கோல்டன் ஹவர் ஆப் ஸ்லீப் (Golden hour of sleep) என்று சொல்வதுண்டு. கனவுகள் இல்லாத ஆழ்ந்த தூக்கத்தை இந்த நேரத்தில் தூங்கிவிட்டால் உடலில் எந்த பிரச்னையாக இருந்தாலும் அதன் வீரியம் குறைந்து குணமடையும் வாய்ப்புகள் அதிகம். பித்தம் தொடர்பான பிரச்னை, குழந்தையின்மைக்கான பிரச்னைக்கு அடிப்படையான காரணங்களில் ஒன்று சரியாக தூங்காமல் இருத்தல்.  எனவே, இந்த நேரத்தில் சரியாக தூங்கி எழுந்தால் உடலின் பாதி நோய்கள் குணமாகிவிடும்.